Bi urte eta gehiago dira Habi loratu zela. 2018. urtean sortu zen, Jon Ander Artola eta Yeray Gascon taldekideen bideak gurutzatuta. Villabonan jaioak dira biak, eta musikarekiko pasioak elkartu zituen haien bideak. Horren emaitza da Habi: Jon Anderren bateriaren indarra eta Yerayren gitarraren soiltasuna, azkenaren ahots bereziaren osagarri. Batu eta sei hilabetera plazaratu zuten lehen lana: ‘Loratu’. Zortzi kantu biltzen ditu, eta aurkeztu zutenetik hainbat herritan eta aretotan izan dira. Konfinamendu garaian iritsi da bigarrenaren proiektua: azken hilabeteetan sortu dituzten abestiak bildu, findu eta bigarren disko batean jaso dituzte. Lehen lanaren kasuan bezala, Elkar estudioetan grabatu dute, Victor Sanchezen gidaritzapean. Udazkenarekin batera plazaratuko dute, eta paisaia ugari eta koloretsu baten ispilu izango da. Paisaia horren zati da ’Harri’, bigarren lanaren lehen aurkezpen kantua: erritmo biziz eta jostariz josia. Harrikada bat belarrian.